BANSA PENAMBAH KE BISI DALAM JAKU IBAN

1   a) Padahka bansa penambah ke bisi dalam jaku Iban?

Ø  Dalam jaku Iban bisi ngembuan empat iti bansa penambah

Ø  Penambah mua, penambah belakang, penambah selit enggau penambah kepit

Ø  Penambah mua baka b-, be-, di-, em-, en-, ke-, m-, n-, pe-, se-, te-,enggau  beke-.Penambah mua tu nyadi ari meri penambah ba pun leka jaku.

Ø  Chunto leka jaku ti udah diberi penambah mua iya nya bumai, bulih, berintai, beguna, diambi, dibuai, empakap, enchuri, enselur, kesatu, mali, mai, nekan, nuang, pechara, pelajar, seati, sebala, teterap, tedai, bekekebap enggau bekekaung.

Ø  Penambah belakang ba jaku Iban mina bisi siti aja iya nya –ka. Penambah belakang tu ditambahka ba ujung leka jaku.

Ø  Chunto leka jaku ti udah diberi penambah belakang iya nya tuangka, baumka, dipelajarka, meletupka, teempaka, ngangkatka enggau ti bukai.

Ø  Penambah selit jaku Iban bisi tiga iti iya nya ga- er- enggau el-. Penambah selit tu nyadi ari nyelitka penambah ba leka jaku.

Ø  Chunto iya tau dipeda ba jaku kemayang enggau bigi. Enti udah bisi diselitka penambah kepit leka jaku kemayang  nyadi kelemayang, bigi nyai berigi lalu geraji myadi geragaji.

Ø  Penambah kepit ba jaku Iban mayuh.

Ø  Kebuah pia laban penambah kepit tu nyadi berindik ari ngepitka leka jaku ngena penambah mua enggau penambah belakang ba urat jaku.

Ø  Chunto iya ba leka jaku betuliska, dipebasaka, pejalaika, diempaska enggau ti bukai.

Ø  Ari meri penambah ti udah ditambah ba urat jaku, reti leka jaku nya pan bebida.

Ø  Nya mih gaya bansa penambah ke bisi dalam jaku Iban.

b) Terangka bakani pengawa nempa jaku tau nyadi beduduk ari proses penambah.

Ø  Ba jaku Iban, pengawa nempa jaku tu nyadi datai ari proses meri penambah ngagai urat jaku.

Ø  Chunto iya tau dipeda  ba leka jaku “pejaku”.

Ø  Leka jaku pejaku tu endang udah bisi ba jaku Iban. Ba jaku Iban leka jaku “pejaku” tu bisi dua iti reti.

Ø  Keterubah iya mai reti ti mandangka jaku adjektif. Iya madahka orang ti kemerah bejaku.

Ø  Chunto ayat, “Pejaku mat Indai Chil enggau kami lebuh kami nemuai ngagai iya kemisi tu tadi.”

Ø  Taja pia, leka jaku pejaku tu tau nyadi jaku nama lebuh udah nerima penambah mua “pe-“.

Ø  Iya nya nambah penambah mua “pe-“ dipegulaika enggau urat jaku “jaku” nyadi “pejaku”

Ø  Lebuh udah nerima penambah mua “pe-“ nyadi “pejaku” ngasilka jaku nama mandangka orang ti bejaku.

Ø  Chunto ayat, “ Pejaku ke meri kami seminar pengerai ari nya Lutur Thomas Bangkit ari Sepital Nyabau, Bintulu.”

Ø  Ukai nya aja, pengawa nempa jaku tu mega ulih dipeda ba leka jaku “nginti”.

Ø  Leka jaku “nginti” endang bisi udah bisi ba jaku Iban.

Ø  Leka jaku “nginti” tu ditu nyadi jaku pengawa madahka  pengawa orang ke nginti.

Ø  Chunto ayat, “Aki Ungking nurun nginti ba umai iya empu.”

Ø  Taja pia, leka jaku “nginti” tu ulih nyadi jaku adjektif lebuh udah nerima penambah mua “pe-“ iya nya nyadi penginti.

Ø  Leka jaku penginti ditu mandangka jaku adjektif madahka orang ke ka endar nginti.

Ø  Chunto ayat,” Penginti endar Igat enggau Dum nya.”

Ø  Ba leka jaku “nanam” mega pengawa nempa jaku tau nyadi ari meri penambah baka ke udah dipeda kitai ba leka jaku “pejaku” enggau “nginti”.

Ø  Leka jaku nanam endang udah bisi ba jaku Iban.

Ø  Leka jaku “nanam” ditu mandangka jaku pengawa madahka pengawa orang ti betanamka utai.

Ø  Chunto ayat, “Nanam jagung indai ku lemai kemari,” ko Inta madah ngagai Alonie.

Ø  Taja pia, leka jaku “nanam” tu ulih mandangka jaku adjektif enti udah diberi penambah mua “pe-“ nyadi “penanam”

Ø  Penanam mandangka reti orang ke ka endar nanam utai.

Ø  Chunto ayat, “Penanam amat sida Rinta sebilik, nadai utai enda ditanam sida ba kebun sida iya nya dia.”ko Apai Niga madah ngagai Apai Junai.

Ø  Chunto ke bukai mega tau dipeda ba leka jaku pemasu.

Ø  Leja jaku pemasu endang udah bisi ba jaku Iban.

Ø  Reti pemasu kesatu iya nya madangka jaku nama iya nya alan endur kitai bebasu pinggai, mangkuk, periuk enggau ti bukai.

Ø  Chunto ayat, “Pemasu endur sida Riti bebasu sumbat laban tulang manuk.”

Ø  Taja pia leka jaku “pemasu” tau nyadi jaku adjektif enti udah diberi penambah mua “pe-“ ba urat jaku “basu” nyadi pemasu.

Ø  Mandangka reti orang ti ka endar bebasu.

Ø  Chunto ayat, “Pemasu amat menantu Indai  Remy.”

Ø  Ba jaku “tanda” mega pengawa nempa jaku tau nyadi beduduk ari proses penambah.

Ø  Ba jaku Iban leka jaku “tanda” tu endang udah bisi iya nya jaku pengawa.

Ø  Reti tanda tu madahka penagwa orang ke betanda tauka bejugit.

Ø  Chunto iya, “Pekit Tanda ba Pesta Nanas, Sarikei udah narit ati bala temuai datai ngagai pesta nya.”

Ø  Taja pia, leka jaku “tanda” tau nyadi jaku nama sepengudah nerima penambah mua “pe-“ nyadi “petanda”. Madahka orang ke betanda.

Ø  Chunto ayat, “Petanda nya landik amat betanda.”

Ø  Nya mih gaya pengawa nempa jaku tau nyadi beduduk ari proses penamba h ti bisi ba jaku Iban.

  

j         c) Pejuraika chara nulis jaku English ti diinjau ngagai jaku Iban. Beri chunto dikena nyukung penemu nuan.

Ø  Jaku English nya jaku bansa bukai ti mayuh diinjau ngagai jaku Iban.

Ø  Lebuh nginjau jaku English ngagai jaku Iban bisi empat iti chara dikena nulis pekara tu.

Ø  Chara kesatu iya nya penemban urup enggau sebut.

Ø  Ba penemban urup enggau sebut tu chara nulis iya ulih dibagai ngagai dua iti bagi.

Ø  Bagi keterubah iya nya penemban urup enggau sebut leka jaku ti beujungka konsonan turu.

Ø  Ba leka jaku injau ti baka tu, sida disepil bekelapungka urup ‘a’ ngambika mudah disebut.

Ø  Chunto jaku English iya nya leka jaku “paradigm” lebuh diinjau ngagai jaku Iban nyadi “paradigma”. Urup “ –gm” ba jaku Engish dikelapungka enggau urup “a” lebuh diinjau ngagai jaku Iban nyadi “-gma”.

Ø  Kelimpah ari chunto di atas nya tadi, sebengkah agi leka jaku ti dikelapung ngena urup ‘a’ nya baka tu “atmosphere” enti ba jaku English.

Ø  Lebuh dinjau ngagai jaku Iban ujung leka jaku “-phere” nya dikelapungka enggau urup “a” ba jaku injau Iban nyadi “atmosfera”.

Ø  Bagi kedua ba penemban urup enggau sebut tu iya nya penemban urup enggau sebut leka jaku ti bepunka konsonan turu.

Ø  Sekeda leka jaku English ti diinjau enda kena serangkung atur ba atur nyepil ngena konsonan turu ti mengkang nyerupa tang ditulis nitihka penemban sebut dalam jaku Iban.

Ø  Ba jaku ti bansa tu, konsonan turu ba pun jaku diserara lalu diselepak enggau urup e pepet

Ø  Chunto leka jaku ti bepunka konsonan turu tu iya nya jaku “kelas” ba jaku Iban ti diinjau ari jaku English iya nya “class”. Ba jaku ti bansa tu, konsonan turu ba pun jaku diserara lalu diselepak enggau urup e pepet nyadi “kelas”.

Ø  Pia mega ba jaku “deriba” ti dinjau ari jaku English “driver” nyadi “deriba” sepengudah diinjau nagai jaku Iban.

Ø  Urup “dr-“ nyadi “der-“ lebuh ba jaku Iban.

Ø  Lalu sama mega enggau leka jaku “glass” enti ba jaku English lalu diinjau ngagai jaku Iban nyadi “gelas”.

Ø  Urup “gl-“ ba jaku English konsonan turu ba pun jaku diserara lalu diselepak enggau urup e pepet nyadi urup “ge-“.

Ø  Pia mega ba jaku “plan” nyadi “pelin” enggau leka jaku “stamp” nyadi “setem” sepengudah diinjau ari jaku English ba jaku Iban.

Ø  Chara nyepil kedua iya nya ningkilka konsonan sengian.

Ø  Sekeda leka jaku bisi ngembuan konsonan sengian ti endang nyerupa bisi ditulis dalam leka jaku nya tang iya nadai nyengala disebut. Lebuh konsonan tu ditulis dalam jaku Iban, iya ditingkilka.

Ø  Chunto iya ba leka jaku “bomb”  ba Jaku English lalu ba jaku Iban iya disepil bakatu “bom”.

Ø  Konsonan “b” disengianka.

Ø  Pia mega ba jaku “chalk” jaku English lalu enti diinjau ba jaku Iban nyadi “chok”

Ø  Konsonan “l” disengianka.

Ø  Chara ketiga iya nya ngetanka konsonan turu.

Ø  Konsonan turu nya dua tauka tiga urup konsonan ti beturu. Selalu iya konsonan turu ayan ba pun, tengah tauka ba ujung leka jaku. Jaku English ti ngembuan tukuh tu lebuh diinjau ngagai jaku Iban ditulis nitihka sistem sepil jaku Iban.

Ø  Chunto iya, leka jaku “credit” ba jaku English lebuh diinjau ngagai jaku Iban konsonan turu “k” bisi dipeda ba pun ba leka jaku iya nya nyadi “kredit”.

Ø  Chunto konsonan turu ba tengah iya nya diinjau ari jaku English iya nya pastor tetap disepil “pastor enti ba jaku Iban.

Ø  Konsonan turu “st” bisi dipeda ba leka jaku “pastor”.

Ø  Konsonan turu ba ujung iya nya leka jaku “export”

Ø  Sepil tetap sama sama enggi jaku English.

Ø  Konsonan turu ba jung leka jaku iya nya konsonan “t”.

Ø  Chara kepenudi endar chara nulis jaku English ti diinjau ngagai jaku Iban iya nya ngetanka tukuh visual.

Ø  Tukuh visual tauka tukuh gaya peda nya siti pola tusun urup ti terang ngayanka sagam reti leka jaku nya. Tukuh ti baka tu ngemudahka orang meretika reti tauka konsep leka jaku nya.

Ø  Chunto tukuh visual suah didinga kitai iya nya auto, audio, tekno enggau tele.

Ø  Auto reti rama Kediri empu, audio reti rama hal munyi, tekno reti rama hal teknologi enggau tele reti rama madahka hal penyauh.

Ø  Chunto leka jaku iya automobile, autonomi, audiovisual, teknokrat, telefon enggu mayuh agi ti bukai.

Ø  Nya mih gaya chara nulis jaku English ti diinjau ngagai jaku Iban.